Возачот на мотоциклот „Кавасаки“, кој усмрти пешак и побегна без да му укаже помош, наместо во притвор, ќе го чека епилогот од истрагата во удобноста на својот дом. Судија на претходна постапка од Кривичниот суд не ја уважи предлог-мерката на обвинителката која бараше ефективен притвор, односно возачот кој беше во бегство да биде спроведен во затворот во Шуто Оризари.
Основното јавно обвинителство Скопје има поднесено жалба за определената мерка куќен притвор, информираа денеска оттаму. Министерот Тошковски, на денешната прес-конференција, прашан дали е точно сведоштвото на очевидците дека истата вечер 25-годишникот бил бркан од полициски екипи и дали е точно дека и претходно бил осудуван, рече дека лицето ќе одговара за она што го сторило.
„Од информациите што ги имам, точно е дека лицето не беше достапно на органите на прогонот, точно е дека го пронајдовме и дека е спроведен таму каде што му е местото и дека ќе одговара за она што го сторил“, рече Тошковски.
Од ОЈО Скопје вчера информираа дека е поведена истрага против 25-годишниот скопјанец кој, откако со мотоцикл усмрти 68-годишен маж, побегна од местото на настанот.
