Полицијата експресно уапси 44 годишен маж под сомнение дека ги опожарил двете возила пред бугарската амбасада. МВР соопшти дека веднаш по пријавата, која била примена во 12 часот и 13 минути биле преземени интензивни мерки и активности за расчистување на случајот и пронаоѓање на сторителот.
„Во краток временски период е идентификувано и пронајдено лицето за кое постои основано сомение дека го сторило делото. Станува збор за И.Д. (44) од Скопје. Тој е лишен од слобода и задржан во полициска станица. Против него ќе биде поднесена соодветна кривична пријава во итна постапка“, се вели во полициското соопштение за случајот.
Инаку во пожарот нема повредени и за кратко време бил изгаснат. Владата и Министерството за надворешни работи остро го осудија инцидентот. Во реакцијата се наведува дека државата има капацитет и ќе одговори со сета сила и нема да дозволи поединци да го нарушат угледот на Македонија.
„Ваквите дејствија претставуваат напад врз принципите на безбедност, дипломатските односи и меѓународното право и не треба да се случуваат во демократска држава. Сакаме да испратиме јасна порака дека секој обид за предизвикување тензии, ширење омраза или нарушување на безбедноста ќе биде санкциониран со максимална мера“, велат од Владата.
Министерот за надворешни работи Тимчо Муцунски остварил телефонски разговор со бугарската колешка Велислава Петрова – Чамова, при што најостро го осудил инцидентот, информираат од македонскот МНР. Реагираше и бугарскто МНР.
„Овој последен напад врз Бугарија и Бугарите е резултат на агресивен политички говор кој поттикнува омраза и недостиг на соодветна реакција од институциите во претходни слични случаи, кои создаваат чувство на неказнивост за сторителите“, велат од МНР на Бугарија.
