Полициските службеници во текот на изминатото деноноќие лишиле од слобода 13 возачи на територијата на целата држава поради безобѕирно управување со моторно возило, соопшти Министерството за внатрешни работи.
Од приведените, седуммина управувале возило без возачка дозвола, при што еден од нив бил малолетник. Кај едно лице било утврдено дека возело и без возачка дозвола и под дејство на алкохол.
Во текот на контролите, пет лица биле затекнати како управуваат возило под дејство на алкохол. Еден од нив учествувал во сообраќајна несреќа во која се здобил со тешки телесни повреди.
Воедно, на граничниот премин Табановце бил приведен странски државјанин, откако системот „Безбеден град“ евидентирал дека возел со 164 километри на час на место каде што ограничувањето е 80 километри на час.
Од МВР најавуваат дека по целосното документирање на случаите ќе бидат поднесени соодветни кривични пријави.
Министерството апелира до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит, доколку имаат изречена забрана за управување или се под дејство на алкохол, со цел зголемување на безбедноста во сообраќајот.
