МВР поднесе кривична пријава против градоначалникот на Делчево, Горан Трајковски.
Основата е сомнеж дека тој сторил кривично дело „Злоупотреба на службената положба и овластување“. Имено, според соопштението на МВР, Трајковски по јавен оглас од 25.06.2018 за вработување административен службеник, злоупотребувајќи ја својата службена положба и овластување и пречекорувајќи ги границите на службената должност, донел незаконска одлука за избор на кандидатот В.М. од Делчево.
Станува збор за кандидат кој уште во првата фаза од постапката за вработување, како и во моментот на донесување на решението за стекнување на статус на административен службеник, ги исполнувал законските услови за пензија со навршени 64 години. Според МВР, тоа е основ за престанок на работен однос на административен службеник, а не за вработување.
Со незаконското вработување, пријавениот Г.Т. му овозможил на В.М. да се стекне со противправна имотна корист од 505.561 денари на име плата, а на Општина Делчево ѝ била нанесена штета од 762.318 денари по основ на исплатени плати и придонеси.
