Директорот на Бирото за јавна безбедност, Александар Јанев, денеска присуствуваше на започнувањето на првата фаза од Програмата за поддршка при психолошка траума, што претставува новина во полицискиот систем и важен чекор кон создавање современа, професионална и одговорна полиција. Програмата се реализира со поддршка на Мисијата на ОБСЕ во Македонија, со цел полициските службеници да стекнат знаења и практични вештини за препознавање на стресот и траумата, психолошка прва помош, кризна интервенција, колегијална поддршка и навремено упатување кон стручна помош, соопштија попладнево од Министерството за внатрешни работи.
Во своето обраќање, директорот Јанев истакнал дека полициските службеници се меѓу првите кои пристигнуваат на местото на несреќи, трагедии, насилства и други кризни ситуации.
– Полициските службеници се соочуваат со тешки сцени и човечка болка, а истовремено од нив се очекува да останат присебни, да носат одлуки под притисок, да го спроведуваат законот и да ја гарантираат безбедноста на граѓаните. Но, зад секоја униформа стои човек – истакнал Јанев.
Тој посочил дека токму затоа е важно полициските службеници да бидат отворени едни кон други, да разговараат и да си помагаат, нагласувајќи дека барањето помош не е знак на слабост – туку знак на одговорност, професионалност и грижа за себе и за колегите.
Јанев истакнал дека постојаната изложеност на трауматични настани и насилство, работата во смени, недостатокот на сон, стравот за сопствената безбедност и семејните предизвици, можат да остават сериозни последици, додека стравот од стигматизација често ги спречува луѓето навреме да побараат помош.
– Оваа програма нема да биде еднократна активност. Таа ќе стане дел од континуираните обуки и системот за поддршка на полициските службеници, со што психолошката отпорност, превенцијата и колегијалната поддршка ќе се вградат како трајни елементи на современиот полициски систем – нагласил директорот на БЈБ.
Тој порачал дека граѓаните заслужуваат силна, стабилна и ментално подготвена полиција – полиција која професионално одговара на секој предизвик и одговорно се грижи за своите луѓе.
– Се грижиме за граѓаните. Се грижиме едни за други. Затоа што сме едно полициско семејство. Не молчи. Побарај помош навреме. Прашај го колегата до тебе како е и биди поддршка без осуда. Препознај. Реагирај. Помогни. Заедно сме посилни – порачал Јанев.
