Искрена благодарност, во име на македонскиот народ, Владата и државата, за високото ниво на солидарност што Словенија го покажува – доказ за длабоката почит помеѓу нашите земји и народи, истакнал денеска во Љубљана, министерот за надворешни работи и надворешна трговија Тимчо Муцунски, на одвоени средби со министерката за надворешни работи, Тања Фајон и министерката за здравство Валентина Преволник Рупел и медицинскиот персонал кој се грижи за нашите пациенти хоспитализирани во Словенија.
„Имав можност лично да добијам информации од лекарскиот тим и да се запознаам со стручниот кадар кој помогна во еден исклучително важен сегмент – организирањето и реализацијата на медицинскиот транспорт на пациентите. И во Словенија, нашата амбасада, со сите свои капацитети, останува на целосно располагање на семејствата на пациентите. Кризниот штаб од Скопје е во постојана координација со сите вклучени институции во процесот на транспорт, прием и лекување“, порача Муцунски.
Тој разговараше и со лекарскиот тим од словенечката болница кој му се заблагодари за посетата и му порача дека ќе дадат се од себе во лекувањето на пациентите.
„Почитуван министер. Ви благодариме за посетите. Гледаме дека ова е искрена посета, што ни покажува дека интересот на македонскиот народ е подготвен да ги има овие луѓе кои беа толку тешко повредени. Ниту една држава, не може сама да се справи со ваква трагедија и ние сме многу среќни што некако можевме да придонесеме и секогаш ќе бидеме тука кога ќе ви треба. Мислам дека ова е доказ, дека Европа како целина може да се справи со многу различни ситуации, никој сам не може да се справи дури ни нешто слично. Затоа ви благодариме за вашата посета. Со одговорност преземаме дека пациентите се подобруваат. Се надеваме на најдоброто. Ќе дадеме се од себе и ќе останеме тука за вас“, изјави директорот на универзитетска клиника во Љубљана, Марко Југ.
