Од ЕУ очекуваме разбирање, направивме многу отстапки во минатото – за да се зачува кредибилитетот на надворешната политика на ЕУ, потребно е да се најде начин како да се забрза процесот на евроинтеграциите – дециден е министерот за надворешни работи и надворешна трговија Тимчо Муцунски кој е во дводневна посета на Луксембург.
Муцунски кој учествуваше на неформалниот состанок на Советот за надворешни работи на ЕУ, од Луксембург испрати порака дека Македонија е посветена на реформската агенда, но исто така и преку проактивната дипломатија се бори да изнајде решение за откочување на процесот.
Очекуваме разбирање од земјите членки, за огромниот број отстапки кои Македонија ги има направено изминатите три децении. Потребно е да се најде начин, како да ги започнеме пристапните преговори. А секако, покрај овој дијалог што го имаме со европските институции, ние постојано сме во дијалог и со земјите членки. Токму утре ќе имам средба со министерот за надворешни работи на Луксембург и вицепремиер Хавиер Бетел, рече Муцунски.
Министерот се сретна и со еврокомесарката Марта Кос.
– На средбата се разговараше за актуелниот статус на македонското ЕУ-досие, заемната посветеност за надминување на актуелните предизвици и неопходноста од забрзување на евроинтеграцискиот процес. Заеднички беше потврдена посветеноста на Владата кон реформската агенда и целосната усогласеност со Заедничката надворешна и безбедносна политика на Унијата, што претставува силна потврда за стратешката ориентација на државата и трасира кредибилен и веродостоен пат кон полноправно членство во ЕУ, соопшти Миистерството за надворешни работи и надворешна трговија.
