Одличните билатерални односи и континуираната соработка меѓу двете држави, како и конструктивниот политички дијалог што се одвива на сите нивоа, биле потврдени на денешната средба во Сараево на министерот за надворешни работи и надворешна трговија Тимчо Муцунски и министерот за надворешни работи на Босна и Херцеговина, Елмедин Конаковиќ.
– Одржуваме редовен и содржаен политички дијалог на сите нивоа и немаме отворени билатерални прашања. Во денешните геополитички околности тоа претставува редок и позитивен пример во нашиот регион – истакнал министерот Муцунски на заедничката прес-конференција по средбата, соопшти Министерството за надворешни работи и надворешна трговија.
Соговорниците разговарале за актуелните политички состојби во регионот, европската интеграција и политиката на проширување на Европската Унија. Притоа било нагласено дека проширувањето претставува стратешки интерес и за земјите од Западен Балкан и за самата Европска Унија, особено во услови на засилени геополитички предизвици.
– Нашите две држави ги поврзуваат заеднички стратешки цели, пред сè европската перспектива на регионот, како и заедничката определба за зачувување на мирот, стабилноста и безбедноста на Западен Балкан и Европа – нагласил Муцунски.
Во разговорите била потврдена и подготвеноста за понатамошно продлабочување на билатералната соработка, пред сè на економски план. Била истакната потребата од почести бизнис-форуми, подобрување на транспортната поврзаност и повторно воспоставување на директната авиолинија Скопје – Сараево.
– И покрај одличните политички односи, постои значителен простор за унапредување на економските врски меѓу двете земји. Во таа насока, иницираме организирање бизнис-форуми, надминување на оперативните предизвици во транспортот и подобрување на транспортната поврзаност, вклучително и преку повторно воспоставување на директната авиолинија Скопје – Сараево – истакнал Муцунски.
Соговорниците размениле мислења и за актуелните безбедносни предизвици во регионот, при што била нагласена важноста од зачувување на стабилноста, суверенитетот, територијалниот интегритет и политичката независност на Босна и Херцеговина нво согласност со Дејтонскиот мировен договор.
– Цврсто стоиме зад суверенитетот, територијалниот интегритет и политичката независност на Босна и Херцеговина. Почитувањето на државните симболи и меѓународно признатиот субјективитет на БиХ останува наш принципиелен и конзистентен став – изјавил Муцунски.
Осврнувајќи се на евро-атлантската перспектива на Босна и Херцеговина, министерот Муцунски нагласил дека Македонија како како земја членка на НАТО силно ги поддржува евро-атлантските аспирации на БиХ и напорите за спроведување на реформите во соработка со алијансата и меѓународните партнери.
– Истовремено, сметаме дека ангажманот на НАТО и Европската Унија, заедно со присуството на ЕУФОР – „Алтеа“ и Канцеларијата на високиот претставник, остануваат од суштинско значење за зачувување на стабилноста, безбедноста и целосната имплементација на Дејтонскиот мировен договор – нагласил Муцунски.
Во соопштението се додава дека била потенцирана и важноста од меѓусебната поддршка во рамките на актуелните кандидатури во меѓународните организации и форуми.
– Убеден сум дека денешните разговори ќе дадат нов импулс во натамошното јакнење на нашето партнерство и пријателство, засновано на доверба, меѓусебна поддршка и заедничка визија за стабилен, безбеден и економски просперитетен регион – истакнал Муцунски.
Двајцата министри ја потврдиле подготвеноста за натамошно зајакнување на политичкиот дијалог, економската соработка и партнерството меѓу двете пријателски земји.
