Министерот за надворешни работи и надворешна трговија Тимчо Муцунски денеска остварил средба со делегација од Ostausschuss der deutschen Wirtschaft, Источниот комитет на германското стопанство.
– Разговаравме за продлабочување на економската соработка меѓу двете држави и привлекување нови германски инвестиции, како и за инвестициските поволности, особено во Технолошко-индустриските развојни зони (ТИРЗ). Го истакнавме и ангажманот на Владата за унапредување на бизнис-климата и условите за работа за домашните и странските компании, со цел економски раст, развој на приватниот сектор и отворање нови работни места, напиша на неговиот фејсбук профил Муцунски.
На средбата биле разменети мислења и за глобалните економски предизвици и нивното влијание врз трговијата и инвестициите.
– Се согласивме дека, и покрај неизвесностите на светско ниво, двете земји, потпирајќи се на одличните политички односи, остануваат силно посветени на натамошно јакнење на билатералната економска соработка, напиша министерот Муцунски на фејсбук.
