Меѓународниот монетарен фонд ја поздравува посветеноста на Владата за фискално консолидирање и намалување на буџетскиот дефицит, но истовремено и предупредува на ризиците од глобалниот раст на цената на нафтата која може да влијае на проекциите за раст на економијата и на инфлацијата. Во извештајот, ММФ истакнува дека земјата во 2025 забележа солиден економски раст од 3,5% главно поттикнат од инвестиции во градежништвото и силна приватна потрошувачка, која пак била поддржана од повисоки плати и кредитирање. Исто така и намалување на инфлацијата од високите 4,8% во јули 2025 година на 2,9% во февруари 2026 година.
Сепак иако 2025 година заврши со солиден раст, војната на Блискиот Исток и високите цени на енергенсите според монетарците ќе го забават темпото на раст на 3,1% годинава, додека инфлацијата се очекува повторно да се искачи до 4,5%.
Монетарците сметаат дека фискалната консолидација треба да продолжи во среднорочен период, со цел буџетскиот дефицит да се сведе на 2 проценти до 2030 година. Што се однесува до приходите, фондот укажува дека придобивки може да се остварат преку редуцирање на ослободувањата од ДДВ, јакнење на даночната администрација и борба против сивата економија.
Мисијата на ММФ го оценува финансискиот систем како стабилен. Банкарскиот сектор е добро капитализиран, ликвиден и профитабилен, а нефункционалните кредити се ниски. Кредитниот раст се забрза во 2025 година, особено во сегментот на недвижности, поддржан од раст на цените на становите. ММФ упатува и на одредени ризици и посочува дека изложеноста кон недвижности бара внимателно следење.
