Во Дрилон, Поградец Албанија се одржа првиот детски фолклорен фестивал „Фолкид“, на кој учествуваа и младинската група на КУД „Илинден” од Битола и фолклорната група „Преспа” од Пустец. На фестивалот учествуваа 12 детски фолклорни групи, со 200 учесници, од Албанија, Македонија и Косово претставувајќи ги пред публиката автентичните ора, традиционалните песни и народните носии карактеристични за нивните региони.
Преку изведбата на народни ора и песни, учесниците испратија порака за важноста од зачувувањето на националниот идентитет и културното наследство, покажувајќи дека традиционалните вредности продолжуваат да живеат и гордо да се пренесуваат на новите генерации.
– На фестивалот се претставивме со сценската постановка „На ливада“ од Валентин Соклевски и достојно ја претставивме македонската фолклорна традиција. Меѓусебната размена на традициите, културата, ора и песни придонесува за подобро запознавање и зближување на младите, изјави Филип Јаковлевски, кореограф на битолската група.
Овој културен настан, според организаторите, ќе прерасне во традиционална манифестација, со учество на групи и од други земји, создавајќи простор за промоција на фолклорот и за зближување на децата од различни региони преку уметноста и културата.
-Групата „Преспа” освен со традиционалните македонски ора и песни се претстави и со ретки приказни од нашето културно наследство. Меѓу нив, Марина Трпо ја претстави плетенката на својата прабаба – вреден елемент кој внимателно се чува и се пренесува од генерација на генерација, сведочејќи за силната поврзаност на преспанските семејства со традицијата и сопствениот идентитет, велат од групата „Преспа“.
Девојчињата не заборавија да ги украсат своите народни носии со накит, шамии и традиционални додатоци наследени низ годините, давајќи му на својот настап посебна културна и историска вредност.
Организаторите изразија задоволство од учеството и високото уметничко ниво на фолклорните групи, нагласувајќи ја важноста на ваквите иницијативи за зачувување и промоција на духовното и културното наследство.
