Министерот за правда Јетон Шасивари им ги додели повелбите на новоименуваните нотари. Упатувајќи им искрени честитки, им посака успешна и професионална работа, со порака дека, заедно со своите поискусни колеги, треба да бидат цврст темел на правдата, правната сигурност и владеењето на правото, информираат од Министерството за правда.
– Вашата професионалност, интегритет и одговорност се од особено значење за јакнењето на довербата на граѓаните во правниот систем – истакнал министерот Шасивари.
Новите нотари, како што велат од Министерството, ја преземаат својата одговорна функција со обврска да постапуваат совесно, непристрасно и во согласност со законите, придонесувајќи кон ефикасен и сигурен правен систем.
– Им посакуваме многу успех, професионални предизвици и резултати во извршувањето на нивната значајна функција, со уверување дека нивната работа ќе биде во служба на граѓаните и правдата – се вели во соопштението од Министерството за правда.
