Министерката за финансии, Гордана Димитриеска-Кочоска, ќе учествува на министерскиот состанок, кој ќе се одржи денеска и утре, во организација на Светската здравствена организација, а посветен на елиминирањето на штетните влијанија од употребата на тутун.
На состанокот на високо ниво учествуваат министри и заменици министри за финансии од земјите на регионот, како и претставници на Светската здравствена организација, Европската комисија, Обединетото Кралство, Словенија, Светската банка, Светската царинска организација, Организацијата за економска соработка и развој, како и претставници од академската заедница.
Целта на состанокот е да се подигне свеста за проблемот со нелегалната трговија со тутун и нејзиното влијание врз даночната администрација, здравјето и одржливиот развој, како и да се споделат искуства во справувањето со овој проблем и потенцијалот на земјите во борбата против нелегалната трговија со тутунски производи.
