Битола живее во духот на културата и туристичката промоција на градот со полни сместувачки капацитети, со над 20.000 посетители на концертот на Здравко Чолиќ и над 9.000 посетители на фестивалските настани на „БитФест“, информираа од Културно информативен центар (КИЦ) Битола, установа чиј основач е Општина Битола.
Според директорот на КИЦ Битола Димитар Михајловски, по празничните денови, Битола продолжува да живее со богатата програма на Битолското културно лето „БитФест, кое до крајот на јули реализираше 46 настани со повеќе од 9.000 посетители, а културните настани во Битола, продолжуваат како туристичка атракција и во следните денови.
-Годинашното издание на фестивалот за првпат е во целосна организација на КИЦ Битола, чиј основач е Општина Битола, а програмската концепција на културното лето целосно кореспондира со визуелниот идентитет на фестивалот – фреската на македонскиот академски сликар Борко Лазески, насловен според песната „Битола, бабам Битола“. Од денешен агол слободно можеме да кажеме дека програмата што ја утврдивме соодветствува на визуелниот идентитет на „БитФест“, а тоа е фреската „Битола, бабам Битола“. На ова ремек-дело, изработено во 1991 година, сместено во големата сала на битолската пошта, може да се прочитаат стиховите „Битола, бабам Битола. Таму се живот живее, таму се јаде и пие, таму се игра и пее“. Токму тоа денес се случува во нашиот град. Да потсетам, Борко Лазески верувал дека уметноста треба да биде достапна за секој човек, поставена на места каде што луѓето живеат, се движат и секојдневно комуницираат. Триесет и пет години подоцна, слободно можеме да кажеме дека и ова лето и на овој „БитФест“, исто како и на фреската, има многу луѓе, многу живот и многу уметност. Делата на уметниците се достапни за секого, на сите локации што ги избравме за нашата културна понуда, нагласи Михајловски.
Фреската на Лазески, која годинава е официјален визуелен идентитет на фестивалот со согласност од семејството на авторот, претставува вистинска хроника на битолскиот живот. На неа се испреплетуваат сцени од Илинденскиот период, конзулска Битола, боемскиот живот, ликовната и музичката уметност, богатите библиотеки, пајтоните и браќата Манаки со нивната легендарна „Камера 300“. Таа истовремено потсетува на историското наследство и на космополитскиот дух по кој Битола е препознатлива.
-Токму во хармонијата меѓу урбаното и традиционалното, меѓу европскиот дух и народното наследство, се наоѓа уникатноста на Битола. Како што на фреската женската убавина, музиката, книгата, театарот и историјата создаваат една жива и динамична целина, така и годинашниот „БитФест“ ги спојува различните уметнички изрази и генерации во заедничка прослава на културата. Денешната фестивалска атмосфера, исполнетите сцени, плоштади и културни простори се вистински одраз на визијата на Лазески – Битола како град во кој се живее, се создава, се игра и се пее, град во кој традицијата и современоста се надополнуваат и заедно го градат неговиот препознатлив идентитет. Битолското културно лето продолжува и во наредниот период со бројни содржини за сите генерации, потврдувајќи ја пораката што Борко Лазески ја оставил на своето ремек-дело: дека уметноста им припаѓа на граѓаните и дека градот живее најсилно тогаш кога се игра, се пее, се создава и се споделува културата, посочи Михајловски.
На Битолско културно лето, следуваат повеќе настани, меѓу кои на 6 ти август, во Офицерскиот дом, концерт ќе одржи Трио „Интерарт“, а на Хераклеа гостува ансамблот „10 те бузуки на Домна“ од Грција.
