„Јас не го правам ова заради ПР, туку за да се соочам со ситуацијата и отворено да зборувам со медиумите“, изјави премиерот Христијан Мицкоски, одговарајќи на прашање во врска со неговата посета на повредените од пожарот во Кочани.
Тој нагласи дека во текот на неговите посети на пациентите, следел сите медицински протоколи и не направил никакви објави за да не ги изложи личните податоци на повредените.
„Не го правам ова за да излегувам пред медиумите и да правам ПР, туку за да разговарам со вас отворено за сето она со кое се соочуваме во овие моменти. Во текот на вчерашниот и денешниот ден, никогаш нема да објавам име или лице на пациент што го посетив. Има такви кои влегуваат со камери, но јас никогаш не влегов со камера, ниту имам намера да правам ПР“, рече Мицкоски, нагласувајќи дека единствените фотографии што се направени се од неговата позадина, а не од пациентите.
Тој истакна дека неговата цел не е да прави пропаганда, туку да им се обрати на граѓаните преку медиумите и да им испрати важни пораки. „Ако сметате дека има проблем во тоа, иако не верувам дека сите ваши колеги мислат така, тогаш ќе ја преземам одговорноста“, додаде Мицкоски.
„Не е мојата цел да правам ПР, и не мора да објавувате ништо од ова што го зборувам, ниту слики или статуси“, апелираше премиерот до медиумите.
