Раст од 3,2% на Бруто Домашниот Производ, рекорден број на странски директни инвестиции по глава на жител во 2024 година и намалување на јавниот долг за речиси 3%. Македонската економија, полека, но, сигурно се опоравува, а буџетот се полни со предвидената динамика. За премиерот Мицкоски, примарната цел на оваа Влада е преку домаќинско владеење да се продолжи со трендот на раст и во првиот квартал од годинава.
„Апсолутно тоа се први индикации дека економијата заздравува, дека одиме во правилна насока за помалку би рекол од три квартала, да ја стабилизиравме состојабта во државата што беше наша примарна цел, да ја стабилизираме од слободниот пад, а потоа се разбира преку активни и домаќински политики и чесно и добро владеење, да успееме да обезбедиме раст на економијата во третиот квартал ќе ве потсетам тоа беше 3 сега е 3,2% очекувам овој тренд да продолжи и во првиот квартал од оваа година, очекувам уште една убава вест до крајот на неделата“, изјави премиерот на Македонија Христијан Мицкоски.
Премиерот Мицкоски очекува трендот на раст на директните странски инвестиции да продолжи и во 2025 година, а со голем дел од странските компании се веќе во преговори. Најмногу се од секторот на енергетиката, кои што треба да ја направат Македонија енергетски независна на подолг период.
„2024 година ја завршивме со рекордно историско ниво на странски инвестиции од 1 милијарда и 255 милиони евра, со што повторно по глава на жител сме држава со најголем број на странски инвестици во регионот. Во јуни ставаме на „Алказар“ точно инвестицијата, тоа се половина милијарда американски долари инвестиција, со што конечно ќе имаме поголемо производство на електрична енергија од тоа што го трошиме“, изјави премиерот Христијан Мицкоски.
Минимална плата од 500 евра уште од април е прифатлива за оваа Влада, само доколку за тоа има договор со работодавачите на економско социјалниот совет. Но, ако се мисли на предлогот, на опозицијата, Владата да субвенционира до 30 илјади денари, за Мицкоски тоа е знак дека Синдикатот се претворил во партиска бина на СДСМ, ДУИ и „Левица“.
Љубиша Владимиров
