Посетата на Обединетите Арапски Емирати (ОАЕ) беше извонредно успешна, а македонската делегација беше пречекана на високо ниво во Абу Даби. За време на посетата, премиерот Христијан Мицкоски имаше 75 до 80-минутен разговор со претседателот и главниот емир на ОАЕ, кој требаше да трае само 20 минути. Разговарано беше за геополитички теми, како и за можностите за странски инвестиции. Мицкоски денеска одговараше на прашањата на пратеничката Бети Стаменкоска-Трајкоска, кои се однесуваа на посетата, инвестициите, како и на плановите за зголемување на платите и подобрување на животниот стандард на граѓаните.
„Ќе има многу убави вести од оваа посета. Очекував дека ќе се случат денес, но поради некои детали кои треба да се усогласат, првата добра вест очекувам да ја објавиме уште утре. Таа ќе биде административно-политичка, а економските убави вести се очекува да се случат до крајот на годината, по возвратната посета од влијателни бизнис личности од ОАЕ“, рече Мицкоски.
Тој истакна дека македонската делегација имала средби и со претставници на Стопанската комора во Дубаи, при што се разговарало за четири клучни области: туризам, енергетика, градежништво и инфраструктура. Мицкоски најави и враќање на авионската линија Скопје-Дубаи од оваа есен.
„Особено задоволство ми е што редовната авионска линија меѓу Скопје и Дубаи ќе се врати оваа есен. Операторот ‘Флај Дубаи’ веќе потпиша договор со министерството за транспорт и врски. Преговараме и за дополнителна линија, можеби меѓу Дубаи и Абу Даби и Охрид“, додаде премиерот.
Тој исто така истакна дека македонската делегација имала средби со големи компании, разговарајќи за инвестиции во градежништво, изградба на ски центарот Попова Шапка, како и во енергетскиот сектор, за изградба на централите Чебрене и Галиште.
Во однос на пратеничкото прашање за животниот стандард и зголемување на платите, Мицкоски одговори дека платите се зголемени за 9,6% според последните податоци од статистиката. Од 1 мај, инспектори од Државниот пазарен инспекторат ќе излезат на терен, за да спречат понатамошно енормно зголемување на цените на прехранбените производи и да ја подигнат свеста на трговците и супермаркетите.
„Платите во образованието, здравството и Министерството за внатрешни работи веќе се зголемени во однос на минатата година. Ова ветување е веќе исполнето“, нагласи Мицкоски.
