Премиерот на Македонија, Христијан Мицкоски, денеска го започна денот со серија значајни билатерални средби, меѓу кои и со Борјана Кришто, претседавач на Советот на министри на Босна и Херцеговина. Разговорите беа насочени кон унапредување на економската соработка и отворање нови можности за странски инвестиции.
Средбата беше дел од серија билатерални разговори и со мултинационални компании, чија улога е значајна за развојот на бизнисот и економијата на глобално ниво.
Во рамки на денешната програма, Мицкоски учествуваше и на панел на кој го презентираше напредокот на клучните енергетски проекти за земјата. Тој истакна дека проектите се насочени кон производство на електрична енергија и подобрување на преносните капацитети на интерконекторите за електрична енергија и гас.
„Денес за првпат ги презентиравме нашите клучни проекти – Бошков Мост, Чебрен и Галиште. Убеден сум дека истите привлекоа големо внимание кај голем број инвеститори“, изјави Мицкоски, потенцирајќи дека овие проекти се стратешки за енергетската стабилност и развој на земјата.
Настанот претставува дел од континуираните напори на Владата за привлекување на странски инвестиции и развој на инфраструктурни проекти со долгогодишен ефект.
Видеото може да го погледнете на следниот линк:
