Германија станува главен економски сојузник на Македонија со се поголем раст на инвестициите, особено во ИТ секторот. Ова беше заклучено на Германско-македонскиот бизнис самит што се одржа во Скопје. Според премиерот Христијан риХ Мицкоски, германските компании не се само инвеститори, туку партнери во трансформацијата на македонската економија. Имаме млади, талентирани и амбициозни луѓе, но и стратешка географска позиција и потенцијал да изградиме модерна и конкурентна економија, рече тој пред присутните.
„Новата економија бара паметни фабрики, автоматизација, вештачка интелигенција и постојано вложување во човечкиот капитал. Нашата визија е младите инженери и иноватори да не ја бараат иднината надвор, туку да создаваат дома“, вели премиерот Мицкоски.
Според податоците кои беа презентирани на Самитот, дури 22 проценти од македонскиот извоз доаѓа од информатичко-комуникациските технологии. Само во 2025 година земјава извезла ИКТ услуги во вредност од 438 милиони евра.Според премиерот и директорката на гераманската стопанска комора во Македонија, овие показатели потврдуваат дека земјата не само што е атрактивна производствена дестинација, туку има потенцијал да се позиционира и како регионален центар за нови технологии, логистика, напредно производство и дигитални услуги.
Дека германските инвестиции се клучни за раст на извозот и индустрискиот развој покажуваат и бројките. Повеќе од 200 компании со германски капитал влегоа во Македонија во изминатиот период, и вработени се повеќе од 30.000 работници. Најголем дел од нив се од автомобилската индустрија.
