Голема градежна офанзива во Македонија. Премиерот Мицкоски е задоволен од тоа како се одвиваат активностите на градилиштата низ земјава. Тој вели дека иам одлична динамика во изградбата на автопатот Охрид – Кичево, при што веќе била пуштена делницата во делот на Требеништа. Интензивно се работи и на санирање на свлечиштата кај Врбјани и Ботун. Во моментов се изведуваат уникатни и сложени инженерски и градежни зафати, кои за прв пат се користат, не само во Македонија туку и во регионот. Премиерот вели дека роковите ќе бидат запазени и дека најверојатно при крајот на летото ќе биде пуштена во употреба цела делница од Извор до Охрид.
„Се работат проектите за стабилизирање на свлечиштата после тунелот кај Врбјани до Кичево, и кај Ботун. Таму беа вицепремиерот и министер за транспорт и директорот на ЈП за државни патишта и снимија едно импресивно видео – првпат во Македонија се гради таков тип на објект и мислам дека ќе биде прекрасно за да се гледа“ – изјави Мицкоски.
Со солидна динамика се гради и на другите патни правци. Мицкоски вели дека интензивно се работи на трите автопатски делници кои ги гради конзорциумот Бехтел и Енка. Се работи за правците од Тетово до Гостивар, од Гостивар до Букојчани и од Прилеп до Битола. Завршен е и тендерот за изведба на делот од Букојчани до Кичево. Службите ги завршиле работите за да се забрзаат активностите: разрешени се имотно правните односи, пробиени се трасите и веќе биле исплатени половина милијарда евра кон изведувачот.
„Сите оние проекти со т.н. „Бехтел и Енка“, односно коридорите 8 и 10Д, околу 90 проценти се расчистени траси, имотно-правни односи, тоа што е обврска на државата е завршено, изведувачот напредува. Околу половина милијарда евра веќе се исплатени за тие проекти. Така што, сигурен сум дека се движиме во добра насока и им честитам на сите кои се вклучени во тие проекти“ – вели Мицкоски.
Изградбата на автопатите, но и железниците и гасоводите и тоа како придонесува за раст на градежништвото. Овој сектор кој покренува уште 22 други гранки, забележа исклучителен раст од 21% минатата година. Владата очекува овие солидни бројки д апродолжат и во 2026-та. За годинава се очекува економскиот раст на Македонија да достигне 3,8%.
