Законот за Скопје – европска престолнина на културата за 2028 година ќе оди на јавна расправа за да не се остави каков било сомнеж во врска со транспарентност на овој процес – најави премиерот Христијан Мицкоски. Додаде дека се работи за закон штотреба да се донесе во рамките на приоритетите на овој проект и оти тој е изготвен во согласност со препораките и праксата во ЕУ.
- Јас ја разбирам реакцијата во јавноста поради тоа што има жесток обид за нејзина дезинформација. Прво, станува збор за фондација „Скопје – европска престолнина на културата“, и тоа е проект што е почнат уште пред 10 години. За жал, досега ништо не е направено – рече Мицкоски во одговор на новинарски прашања при посетата на Клиничката болница во Битола.
Вели дека поради тоа Владата дошла во ситуација да се соочи со еден предизвик, а тоа, како што рече, е првпат проектот „Европска престолнина на културата“ да му биде одземен.
– Затоа влеговме во еден процес во кој јасно ги дефиниравме приоритетите. Но, еден од тие приоритети е и законот што се прави во согласност со сите препораки и пракса на Европската Унија. Не е ова ништо поинакво од она што било во Хелсинки – потенцира премиерот.
Според него, не станува збор за избор на директор бидејќи се работи за фондација преку која, почнувајќи од оваа година, а требало да се почне пред 10 години, ќе се работи на реализација на овој проект.
– За правилно информирање на јавноста, сакам да напоменам дека станува збор за таканаречена книга или bidbook, која е добиена уште пред пет-шест години, во која се дефинирани приоритетите од порано, а Владата и овој градоначалник ги наследи. Тоа се настани што треба да се реализираат 50 дена во 2027 година и секој ден во 2028 година, а во 2029 година фондацијата треба да прерасне во јавно претпријатие, кое ќе има директор – појасни премиерот Мицкоски.
Ова, рече, е суштината на целиот проект.
– За жал, некој се обидува свесно да ја манипулира јавноста и свесно да ги дезинформира граѓаните. Но, она што јас како човек, прво, нема да го дозволам, тоа е да остане каков било сомнеж во кој било процес. Затоа, на мое инсистирање, законот беше повлечен од парламентот. Тој ќе биде ставен на јавна дебата. За жал, малку ќе задоцниме со некои од подготовките како Влада бидејќи веќе 10 години се доцни од претходната влада и од претходните градоначалници, но ќе се обидеме тоа темпо да го задржиме до крајот на годината и да влеземе во процес во кој сè ќе биде навремено испорачано, а Скопје ќе биде европска престолнина на културата 2028 – рече Мицкоски.
