Не се инаетиме и не сме тврдоглави, но не сакаме повторно да влеземе во процес во кој нема да ни биде однапред познат исходот. Премиерот Мицкоски од Вашингтон порача дека Македонија е подготвена за разговори со Бугарија, но овојпат мора да се има јасна патека и крај, а клучот како што вели е во меѓусебната доверба, која не може да се гради еднострано.
„Не се инаетиме, не сме тврдоглави. Но, она што претставува наша цел е нашата стратегија, нашата вистина да ја презентираме на најдобар начин на кој што можеме и преку една политичка дебата, една политичка борба на меѓународната сцена да вратиме дел од позициите кои што претходните влади ни ги загубија“, истакнува премиерот Мицкоски.
Мицкоски е свесен за реалноста и грешките од минатото, но и за барањата на оние кои се залагаат за целосно повлекување од договорите и преговорите. Вели дека Македонија е подготвена да ги слушне аргументи од другата страна, па дури и да прифати дел од нив, но нема да остави простор за избрзани потези. Напротив, Владата ќе продолжи да ја брани својата стратегија и позиција пред европските партнери.
„Од друга страна, очекувањата на некои радикални елементи во нашата структура за повлекување од меѓународни договори и преговори – тоа би било идеално доколку сме ние сами на овој свет, но не сме сами и мораме да се бориме да ги повратиме загубените позиции кои во минатото, за жал, претходната влада ги минираше. Така што во рамките на таа борба ние секогаш презентираме аргументи кои што се јасно методолошки разбирливи на соговорниците“, изјави Христијан Мицкоски, претседател на Владата на Македонија.
Во меѓувреме, Владата ќе продолжи со реформите од Планот за раст и Реформската агенда на патот кон Европската Унија. А, иако во Европа се отвораат идеи за поинакви форми на поврзување со Унијата, премиерот засега смета дека е рано да се зборува за такви модели. Вели дека Македонија треба да ја бара својата шанса во светот што се менува и во кој се прегрупираат интересите, користејќи ја својата географска положба и новите можности.
