Премиерот Христијан Мицкоски смета дека опозицијата е разочарана зашто Македонија во однос на куповната моќ е многу подобра од неколку земји на ЕУ и од сите држави во регионот, но и затоа што бележи евидентни резултати во туризмот.
– За куповната моќ од опозицијата имаше одредени пораки, но и од некои медиуми кои имаат исто мислење со опозицијата. Се водеше плитка кампања која потворно беше демантирана и повторно тие ќе жалат и ќе бидат разочарани зошто Македонија не е најслаба, туку е многу подобра од неколку земји на ЕУ и од сите земји во регионот, рече денеска Мицкоски, одговорајќи на новинарски прашања пред потпишувањето на договорите за финансирање на изградбата на железничката делница Крива Паланка – Деве Баир од Коридорот 8.
Како што истакна, ако се споредат бројките од пред три-четири години, ќе може да се забележи значаен напредок.
– Дали е тоа доволно? Не е. Ќе продолжиме да работиме за уште подобро и повеќе. Мотивирани сме како никогаш. Тие ќе продолжат да креираат хистерија на основа на конструкции и лаги, а ние ќе ги засукаме ракавите како што правевме изминатите 25 месеци и ќе продолжиме да работиме посветено за земјата и граѓаните, потенцира премиерот.
Во врска со бројките во туризмот, напомена дека резултатите се евидентни. И тоа, забележа Мицкоски, е лоша вест за опозицијата.
– Податоците за бројот на туристи и ноќевања излегуваат по 10-ти во месецот, тогаш ќе имаме појасна претстава, но охрабруваат податоците што операторот на двата меѓународни аеродрома ги пренесе, како и Министерството за транспот, дека двата аеродрома се најбрзо растечки во регионот по бројот на патници, но и Светска банка тоа го потенцира. Тоа е лоша вест за опозицијата и нихилистите кои гледаат како да не успее државата, но е добра вест за граѓаните и за сите што и мислат добро на земјата, бидејќи тоа што го работиме 25 месеци полека се консолидира и покажува знаци на жилавост и отпорност на сите кризи и резултатите стануваат се повидливи, рече премиерот.
Тој додаде дека бројот на летови и патници во првите седум месеци веќе не е 1, 2 или 3 отсто зголемен, туку станува збор за 20, 30, 40 проценти. – Тоа претставува нешто значајно што не мотивира да продолжиме во таа насока. Туризмот е еден од приоритетите на Владата и може да видите што се случува овие недели низ Македонија, рече Мицкоски.
