Македонка и нејзиното бебе брутално се убиени во Швајцарија, а главен осомничен е нејзиниот сопруг од Охрид, кој по чинот се обидел да изврши самоубиство.
Имено, во швајцарскиот град Живисиe, во саботата попладне се случила голема трагедија во која беа убиени 30-годишна Македонка и нејзиното шестнеделно бебе. За убиствата е осомничен нејзиниот сопруг – 43-годишен маж со потекло од Охрид, кој живеел во Швајцарија со бугарски пасош. Тој по убиствата се обидел да изврши самоубиство, но преживеал со полесни повреди и бил хоспитализиран под полициски надзор.
Швајцарската полиција ги пронашла мажот, жената и бебето во семејниот стан по дојава од граѓани. Жртвите, идентификувани како М.Т., родена 1995 година, и бебето Д.Т., родено 2024 година, биле прогласени за мртви на местото на настанот.
Првичните информации укажуваат дека мажот, А.Т., роден 1982 година, го признал убиството на сопругата. Јавното обвинителство на кантонот Фрајбур отвори истрага за двојно убиство со умисла.
Македонското Министерство за надворешни работи потврди дека било информирано од швајцарските власти и дека Амбасадата во Берн е во контакт со локалните институции и семејството на жртвите. Иако во Швајцарија бил пријавен како бугарски државјанин, осомничениот е со македонско потекло.
