Од финансиско крварење и заробени институции, до обнова на довербата и воспоставување нови механизми за отчетна власт – вака министерот за добро владеење Арбен Фетаи, ja оцени првaта година од мандатот на владата. Фетаи вети финансиски истраги по кои ќе се конфискува незаконски стекантиот имот и ќе се спречи злоупотребата со државен имот.
„Оваа прва година беше тешка, но беше година на надеж. Зашто не почнавме од нула, туку од минус. Наследивме разурнат и корумпиран систем, но на тие урнатини градиме нова, чесна држава. Под претходното владеење не се памети случај каде моќници биле правосилно осудени за претходното владеење. Трендот на конфискација наместо да расте континуирано опаѓаше се до нула. Тоа ќе се промени Ја усвоивме Стратегијата за финансиски истраги и конфискација на имот 2025-2028. Основавме национален совет кој ќе го водам јас. Имотот на криминалот ќе оди во буџетот на државата за граѓаните за социјален развој, а не во џебовите на корумпираните“, изјави Арбен Фетаи, вицепремиер за добро владеење.
Над 70% од буџетот бил веќе потрошен пред нивното доаѓање. Институциите биле претворени во алатки на злоупотреба. Планови останати мртви букви на хартија, правосудството – заробено. Но, токму од таму, почнало градењето на новиот модел на владеење. Формирано е меѓуресорско тело за борба против корупцијата, првпат со глас и за граѓанскиот сектор. Повторно е активиран Советот за соработка со граѓанското општество, замрзнат од 2022 година. Донесен е Годишниот план за добро владеење за 2025 година, достапен јавно на веб-страницата на Владата.
„Овие постигнувања се само почеток. Пред нас има уште многу работа, но веќе имаме јасен правец“, изјави Арбен Фетаи, вицепремиер за добро владеење.
Македонија во ноември и декември ќе биде домаќин на две клучни регионални конференции – за безбедност и за борба против корупцијата. Целта, рече Фетаи е Македонија да стане регионален центар за добро владеење.
