Македонија, во 2022 година имала 8,5 јавни обвинители на 100 илјади жители, а во 2024 година, како што покажува последниот извештај на Советот на јавни обвинители, тој број е зголемен 9,2, со што полека се доближува околу просекот од 11,2 јавни обвинители на 100 000 жители во 44 земји што ги покрива последниот евалуациски извештај на Европската комисија за ефикасност на правдата ЦЕПЕЈ (CEPEJ) за правосудните системи од 2024, со податоци за 2022 година.
Македонија по бројот на јавни обвинители на 100 илјади жители влегува во друштво на земји како Германија (7,7), Белгија (7,5), Финска (7,9), Малта (8,8), Словенија и Луксембург (9,8) и Северна Ирска (9,3).
Бројот на обвинители на 100 000 жители варира значително од една земја до друга, од минимум 3,2 во Франција и Ирска, 3,8 во Италија до максимум 24 во Бугарија, Латвија и Молдавија.
Како што се движиме кон исток на Европа, бројот на обвинители по жител има тенденција да се зголемува, со стапки генерално повисоки од 15 на 100 000 жители, иако има исклучоци и на североисток, како Финска и Шведска и на југоисток, како Албанија, Грција и Македонија.
Од земјите во регионот, според Извештајот на ЦЕПЕЈ, Грција има 5,7, а Албанија 7,2 јавни обвинители на 100 илјади жители. По што следува Македонија, па Словенија со 9,8, Србија и Босна и Херцеговина со по 10,4 јавни обвинители. Хрватска и Црна гора имаат по 16,2 и 16,6 јавни обвинители на 100.000 жители, додека Бугарија 23,9.
Разликата во бројот на јавни обвинители на 100 000 жители од земја до земја, ЦЕПЕЈ во Извештајот, го објаснува со тоа што 15 земји-членки и една држава набљудувач (Израел) имаат друг персонал со должности споредливи со оние на обвинителите, обезбедувајќи им поддршка на вторите.
Во Италија, „Вицепрокураторот“ им помага на обвинителите со сослушувања за помали прекршоци, студии на судската пракса и подготовка на барања за прекин на случајот.
Во Франција, „délégués du procureur“ се одговорни за спроведување алтернативни мерки на гонење и скратени кривични постапки (ordonnances pénales), следење на извршувањето на казните и учество во локалните политики за спречување на криминалот. Во 8 земји-членки и субјекти, овој број е многу значаен во споредба со бројот на јавни обвинители.
Во 2022 година, на секои 100 обвинители, има 35 вработени со споредливи функции во Австрија, 19 во Франција, 20 во Монако, 23 во Ирска, 76 во Италија, 361 во Малта, 24 во Холандија и 25 во Швајцарија.
Во Извештајот на Советот на Јавни обвинители, за работата на јавните обвинителства во 2024 година спроед правилникот за внатрешна организација и систематизација на работните места во јавното обвинителство, предвидени се 1.126, од кои пополнети биле 371 место.
Со ова, во Македонија на 100 000 жители имало 20,1 јавнообвинителски службеници, додека според извештајот на ЦЕПЕЈ во 2022 таа бројка изнесува 20 и е над просекот, кој изнесува 14,7.
