Македонија бележи напредок на листата на моќност на пасошите што ја објавува „Хенли Паспорт Индекс“. Македонскиот пасош е рангиран на 38. место, со можност за влез без виза во 128 држави.
Сингапур го има најмоќниот пасош во светот, со безвизен пристап до 192 од вкупно 227 дестинации. На второто место се Јапонија и Јужна Кореја, чии државјани можат да патуваат без виза во 188 земји.
Хрватска се најде на шестото место, позиција што ја дели со Чешка, Естонија, Малта, Нов Зеланд и Полска. Најголем напредок во 20-годишната историја на индексот бележат Обединетите Арапски Емирати, кои од 2006 година добиле 149 нови безвизни дестинации и напредувале за дури 57 места.
Спротивно на тоа, Обединетото Кралство го забележа најостриот годишен пад, со осум дестинации помалку од лани и вкупно 182. Соединетите Американски Држави се вратија на десеттото место со 179 дестинации, но зад нив се наоѓаат уште 37 земји со слично ниво на патна слобода.
