Македонија го доби првиот Центар за сајбер безбедност на Западен Балкан. Центарот, кој ќе биде лоциран на штипскиот Универзитет, ќе овозможи директно справување со нападите и дезинформациите во дигиталниот простор. Покрај нашата држава, во овој проект ќе се приклучат Албанија и Црна Гора.
„Ова е Центар кој ги обединува Владата, институциите на Владата и Академијата, која треба да ги развие луѓето кои во иднина ќе работат во МВР и кои ќе бидат подготвени да одговорат на својата функција. Значи, програми, практична настава, спремни да влезат во институциите за да ја направат таа одбрана“, изјави министерката за образование и наука, Весна Јаневска.
Со отворањето на овој Центар, Македонија се позиционира како лидер во развојот на сајбер безбедноста на Западен Балкан. Во време на интензивна дигитализација, ваквите капацитети се клучни за заштита и безбедноста на општеството.
„Имаме сајбер стратегија до 2028 година, за прв пат имаме Закон за безбедност на мрежи и информациски системи, го формираме владиниот центар за одговор на сајбер инциденти, со помош на САД и ЕУ“, изјави министерот за информатичко општество, Стефан Андоновски.
Во рамки на центарот ќе биде поставена современа техничка опрема, а ќе се реализираат и специјализирани академски програми преку кои студентите ќе стекнуваат практични и теоретски знаења.
„Се надеваме дека за кратко време, зборувам за месеци од сега, бидејќи имаме летни одмори, веднаш потоа ќе почнеме со подготовка на програмите за акредитација. Тие програми треба да бидат меѓународно сертифицирани и веднаш потоа почнуваме со првата генерација која ќе биде обучувана“, изјави проф. д-р Сашко Коцевски, проректор на УГД.
За функционирање на овој Центар вложени се околу 80 милиони денари буџетски средства, додека дополнителни 30 милиони денари се обезбедени преку Европската Унија.
