Вештачката интелигенција мора да му служи на човештвото и таа не смее да задира во човековите права. Токму затоа Македонија ја потпиша Рамковната конвенција за вештачка интелегенција на Советот на Европа. Документот ги надополнува постојните меѓународни стандарди за човекови права, демократија и владеење на правото и има цел да ги пополни сите правни празнини што може да произлезат од брзиот технолошки напредок.
„ Се наоѓаме среде технолошка револуција, поттикната од дигитални технологии, каде што вештачката интелигенција бргу се развива – побргу од демократските заштитни мерки. Вештачката интелигенција веќе го обликува начинот на кој носиме одлуки, институциите и довербата и одговорот не е да покажеме отпор на ова транформација”, изјави Берсе.
Македонија е 46- та земја што се приклучува во договорот. Потпишувањето на договорот овозможува државите да ги приспособат мерките во согласност со своите правни и институционални системи, притоа почитувајќи ги универзалните стандарди.
„ Граѓаните ќе имаат поголема заштита на приватноста и личните податоци, како и пристап до ефективни правни лекови доколку нивните права бидат повредени ”, изјави Филков.
Да ги избегнеме ризиците, но, пред сè, да ги искористиме придобивките – за подобри јавни услуги, поефикасно правосудство и посилна демократија, порача Филков. Инаку Конвенцијата беше усвоена од Комитетот на министри на Советот на Европа во мај 2024 година.
Бојана Шурлиновска
