Денеска во Лондон патува германскиот канцелар Фридрих Мерц, кој на средба со британскиот премиер Кир Стармер ќе потпише сеопфатен договор за пријателство како дел од поширокиот напор за ресетирање на односите на Европската Унија со Велика Британија.
„Договорот ќе ги приближи Обединетото Кралство и Германија повеќе од кога било досега“, изјави Стармер пред потпишувањето и додаде дека тој е темелот на кој ќе се гради стратегија за справување со заедничките проблеми, но и инвестиции во заедничките сили.
Пет години по излегувањето на Велика Британија од Европската Унија, Германија и Велика Британија сакаат да создадат нова основа за нивната соработка. Станува збор пред сè за потесна координација во надворешната и одбранбената политика и миграцијата. Исто така, треба да се унапреди и економската соработка и размената меѓу граѓаните на двете земји.
Посетата на Мерц доаѓа една недела по тридневната државна посета на францускиот претседател Емануел Макрон, сигнализирајќи поблиска соработка меѓу трите најважни сили во Европа.
