Локалната самоуправа започна серија од средби со граѓаните во населените места на територијата на општина Маврово и Ростуше за да ги утврдат приоритетите и нивните потреби.
Дел од раководството на општината предводен од градоначалникот Онер Јакупоски, викендов отпочнаа со нова активност – директни граѓански средби со жителите во сите населени места за да се разговора за потреби, проблеми и прибирање на предлози.
Првата средба се одржа со жителите на село Маврово, на која се разгледаа прашањата кои се од особено значење за локалното население.
– На средбата беа идентификувани конкретни проблеми и заеднички беа дефинирани приоритетите за кои е потребно понатамошно постапување. Во наредниот период, со оваа практика ќе се продолжи и во сите останати населени места во општината- рече Јакупоски.
Тој посочи дека низ формата на директен и отворен дијалог со граѓаните полесно може да увидат реалните потреби на секое населено место, а со тоа тие да бидат соодветно вклучени во планирањето на идните активности.
– Особено важно е што приоритетите и предлозите произлезени од овие средби ќе бидат земени предвид при креирањето на буџетот на Општина Маврово и Ростуше, со што буџетското планирање ќе се насочи кон проекти и активности од непосредно значење за граѓаните- нагласи градоначалникот Јакупоски.
Следната средба со граѓаните ќе биде во селото Врбен.
