Со официјално претставување на историско катче кое содржи медицинска апаратура што се користела меѓу двете светски војни денеска Лекарската комора одбележува 34 години постоење.
Медицинската опрема е донација од семејството Србјак, кое е потомок на Ѓорѓи Дудев кој како доктор работел во Прилеп и е еден од првите организатори на здравствениот систем во Македонија.
– Колегата оставил за себе апаратура која ние со гордост ја прикажавме денес. Ако појдете по музеите во нашата држава, нема да видите ниту еден експонат којшто е поврзан со нашата работа. Убаво е да имаме историско катче, убаво е да го формираме музеј за нашата работа, затоа што докторите во Македонија не се само 34 години наназад, откако е Комората формирана, ние работиме со години наназад и оставаме трага, изјави претседателката на Лекарската комора Калина Гривчева Старделова.
Доктор Старделова се надева дека ова ќе биде поттик и за останатите семејства на доктори да донираат ваква опрема која ќе сведочи за едно време и ќе биде доказ дека медицината во земјава не е од вчера.
Старделова на новинарско прашање вели дека има недостиг на медицински кадар, а причините за тоа ги гледа во иселувањето и во недоволно платената работа. Таа додава и дека нема евиденција и дали дипломираните доктори остануваат во земјава или заминуваат во странство затоа што по дипломирањето и по нивното зачленување во регистарот немаат обврска да даваат информација дали ќе останат или не во државата.
