Традиционалната крводарителска акција „Фондовско срце“, која годинава се одржува по осумнаесетти пат е спроведена денеска во Фондот за здравствено осигурување (ФЗО) во соработка со Црвениот крст и Институтот за трансфузиона медицина, а по повод 25-годишниот јубилеј од самостојното функционирање на Фондот.
Од Фондот соопштија дека со акцијата уште еднаш ја потврдуваат својата основна мисија – грижата за здравјето на осигурениците и промовирањето на хуманоста како врвна општествена вредност. Преку овој чин на солидарност, како што се посочува, вработените на Фондот симболично ја спојуваат професионалната посветеност со највозвишениот човечки гест – дарување живот.
Од своето формирање во 2000 година, како самостојна институција за спроведување на задолжителното здравствено осигурување, Фондот доследно ја негува културата на општествена одговорност и лична заложба за заедницата. Крводарителската акција „Фондовско срце“ е токму потврда дека вистинската грижа за осигурениците не се исцрпува во административните и финансиските мерки, туку продолжува преку вистински дела на човечност, доблест и милосрдие. Во остварувањето на овие вредности особено значаен е личниот пример на генералните директори на Фондот, Сашо Клековски и Бранко Аџигогов, кои со своето активно учество ја поттикнуваат свеста кај вработените дека хуманоста е највозвишената форма на грижа за човекот, истакнуваат од ФЗО.
„Дарувањето крв е дарување надеж, живот и човечка топлина. Со оваа акција, Фондот уште еднаш покажува дека зад институцијата стојат луѓе со големо срце – луѓе што живеат и работат во духот на солидарноста“, беше пораката на денешниот настан.
Од Фондот им упатуваат благодарност на сите свои вработени кои секоја година ја докажуваат својата хуманост и придонесуваат кон спасување на човечки животи. Традицијата, започната пред 18 години, продолжува како симбол на колективна совесност и институционална култура која ги поврзува вредностите на професионалноста, човечноста и општествената одговорност, наведуваат од Фондот за здравствено осигурување.
