Меморандум за соработка меѓу Општина Крива Паланка и општина Перечин, Украина, е потпишан во рамки на официјалната посета на градоначалникот Сашко Митовски на збратимениот град, по повод одбележувањето на 627 години од неговото постоење.
Во текот на посетата, како што информираат од Општина Крива Паланка, се одржани работни и пријателски средби, како и присуство на свеченостите по повод празникот на градот, при што е потврдена континуираната соработка меѓу двете општини.
– Со овој меморандум се продлабочува соработката и истата продолжува како израз на долгогодишно пријателство, меѓусебна почит и заедничка определба за понатамошен развој и унапредување на партнерските односи, информира службата за комуникација со јавноста на Општина Крива Паланка.
Од општината посочуваат дека во своето обраќање Митовски ја нагласил важноста од негување на искрените пријателски односи, солидарноста и заедничките вредности, оценувајќи дека ваквите соработки претставуваат мост за поврзување меѓу луѓето, културата и идните генерации.
– Општина Крива Паланка изразува благодарност за топлиот прием и пријателската атмосфера, со уверување за понатамошен успешен развој на соработката, се наведува во соопштението од општината.
