Во тек е санација на оштетувањата предизвикани од невремето на коритото на река Серава, информираше градоначалникот на Општина Бутел, Дарко Костовски.
Преку објава на својот Фејсбук профил, Костовски посочува дека издаден е налог за работа и од вчера активно се работи на санирање на оштетувањата на коритото на реката. По големото невреме, вели, биле забележани оштетувања на одредени делови од коритото, по што била формирана комисија која ги констатирала состојбите.
– Активирана е гаранцијата за проектот за уредување на коритото на река Серава, а во тек е санација на оштетувањата предизвикани од невремето. Издадов налог за работа, а веќе од вчера активно се работи на санирање на сите оштетувања на коритото на река Серава – наведува Костовски.
Проектот „Река Серава“, вели, е еден од неговите најзначајни проекти и нема да дозволи неквалитетна изведба.
– Ова е проект кој 40 години беше ветуван на граѓаните на општина Бутел, а денес е реалност и во целост завршен. Затоа нема да дозволам неквалитетна изведба и согласно договор сѐ ќе биде санирано … Проектот „Река Серава“ е еден од најзначајните мои проекти и заради тоа нема да дозволам никаква неквалитетна изведба поврзана со овој проект. Поради големото невреме, забележавме големи оштетувања на одредени делови на коритото и токму заради тоа веднаш формирав комисија која што констатираше одредени оштетувања на коритото на река Серава – посочува Костовски.
Проектот, додава, опфаќа изградба на речно корито во должина од 1.800 метри, трим-патека и поставување нова урбана опрема, а во рамки на уредувањето е изграден и парк со површина од 5.000 квадратни метри.
– Заедно го менуваме ликот на општина Бутел, заедно спортуваме и рекреираме на овој кеј – порачува Костовски.
