Секој четврти трговец или угостител го прекршил законот со тоа што не издавал фискална сметка. Само за месец ноември Управата за јавни приходи направила околу 4000 контроли, при што биле изречени повеќе од 2500 казни, а 113 фирми добиле забрана за работа. Инспекторите утврдиле дека дел од трговците користеле фискални апарати без налепници од овластен сервисер, а кај други биле забележани оштетени пломби.
„Фактот дека секоја четврта контрола завршува со утврдена неправилност во делот на неиздавање фискални сметки укажува на широка појава на неевидентирање на готовинскиот промет. Во поширок контекст, овој факт укажува и на користење на неевидентираниот промет за плаќања во готовина меѓу фирми и исплата на плати во плик, практики кои се спротивни на законот и претставуваат облици на сивата економија, создаваат нелојална конкуренција и предизвикуваат загуби за буџетот“, велат од Управата за Јавни Приходи.
Пред отпочнување со подеталните контроли и изрекувањето на санкциите, од УЈП велат дека спроведеле обемен процес на советодавни активности и канцелариски анализи со цел да се согледа однесувањето на даночните обврзници и нивото на усогласеност со законските прописи.
Управата најавува засилени контроли во пресрет на новогодишните празници, во кои ќе бидат опфатени ресторани, кафе-барови, дискотеки, сендивачри и други субјекти кои работат со готовински плаќања. Оттаму велат дека ќе следуваат и дополнителни контроли со примена на индиректни методи за утврдување на прикриениот промет и неплатениот данок.
