Од денеска се „чешла“ едно од клучните делови на јавното обвинителство, а тоа е токму оној дел кој гони организиран криминал и корупција.
Со одлука на Јавниот обвинител на Македонија, сите јавни обвинители од Јавното обвинителство денеска вршат контрола во Основното јавно обвинителство за гонење на организиран криминал и корупција.
Претходно, согласно надлежностите на Републичкото јавно обвинителство, контрола беше извршена во сите виши јавни обвинителства во државата. Надзорот се врши во согласност со член 21 од законот за Јавното обвинителство и правилникот за вршење надзор над работата и постапувањето на јавните обвинителства донесен од советот на јавните обвинители.
До крајот на годината ќе биде извршен надзор и над постапувањето на одделението за меѓународна правна помош во Јавното обвинителство на Македонија и над Канцеларијата за врски со европравда во Републичкото обвинителство.
