Штипската Клиничка болница, конечно го решава проблемот недостиг на кадар-еден од најсериозните предизвици со кој се соочува најголемата здравствена институција на Истокот. Со вработување на 18-те здравствени работници ќе се започне веднаш штом заклучокот на ДИК, дека Локалните избори се завршени, ќе биде објавен во Службен весник. Веќе следниот ден болницата, ќе ги потпише договорите за работа со новоприманите. На неопределено време ќе бидат ангажирани 7 лекари по општа медицина, фармацевти и медицински сетри, кои на последниот оглас за вработување распишан пред изборите, оствариле најдобри резултати. Постапката за избор е целосно завршена
„Периодот на интервју на одлука е донесен, периодот на жалби е поминат. Се чека само на завршување на периодот за тие 18лица што се избрани да потпишат договор„ изјави д-р Владко Захариев, директор на КБ-Штип.
Покрај ова, во тек е постапка за нов оглас во Министерствата за здравство и финансии за дополнителни 25 вработувања. Најголем дел ќе бидат технички персонал-болничари, хигиеничари и медицински сестри. Се очекува до крајот на годината да биде распишан уште еден конкурс, со што ќе се намали недостигот на кадар кој се чувствува во речиси сите одделенија.
„Недостаток има на сите одделенија. Не би можел да издвојам некое, критични се сите, но некако се справуваваме со тој недостаток. Се надевам дека со новите вработувања, 2026 ќе ја почнеме во подобра кондиција„ изјави д-р Владко Захариев, директор на КБ-Штип.
Со години штипската Клиничка болница, функционираше со околу 20%помалку вработени од потребното што го отежнуваше секојдневното функционирање институцијата. Најкритично беше на одделите за анестезиологија, очно и ортопедија.
