Кина вети дека нема да попушти пред какви било уцени од САД. Трамп вчера се закани дека ќе ги зголеми царините за увозот од Кина за дополнителни 50 проценти, односно за повеќе од 100 отсто, како одговор на најавените кинески рецепроцни царини од 34 отсто. Трамп првично најави царини за Кина од 34 проценти, кои со претходно воведените 20 отсто се зголемија на вкупни 54 проценти. Кина се најде меѓу државите кои Белата куќа ги опиша како „најлоши престапници“, наметнувајќи им царини повисоки од 10 отсто. Овие царини треба да стапат на сила утре, и Трамп порача дека нема да има нивно одложување, иако некои држави бараат да преговараат.
„Мерките од САД ќе поттикнат дополнителни контрамерки за американските стоки“.
Тврдењето на Трамп дека неговите царини се рецепроцни е неосновано и е типична еднострана насилничка практика, соопшти официјален Пекинг. За изјавата на претседателката на Европската комисија, Урсула фон дер Лаен, дека ЕУ е подготвена да преговара за договор за царини „нула за нула“ со САД, американскиот претседател изјави дека оваа понуда не е доволна. Според него, ЕУ била многу силна низ годините и била формирана за да им нанесе штета на САД во трговијата. Европската унија и понуди на администрацијата на Трамп договор за царини „нула за нула“ за автомобили и други индустриски стоки, како што се фармацевтските производи и хемикалиите.
