Министерот за внатрешни работи, Кателин Предоју, од редовите на Либералите, е именуван за привремен премиер на Романија, ден по оставката на социјалдемократот Марчел Чолаку, соопшти кабинетот на романскиот претседател.
Предоју е актуелен министер за внатрешни работи и привремен претседател на Либералната партија. Претходно бил министер за правда и привремен премиер во 2012 година.
Чолаку поднесе оставка по епилогот од првиот круг претседателски избори, во кои кандидатот на крајната десница, Ѓорѓе Симион, освои убедлив триумф кој му го отвара патот за целосна победа во вториот круг претседателски избори на 18 мај.
„Со оглед на изборните резултати, коалицијата формирана со Либералите и партијата на унгарското малцинство повеќе нема легитимитет,“ изјави Чолаку по состанокот на својата партија во Букурешт.
Кандидатот на крајната десница, Симион, победи во првиот круг со 40,9% од гласовите, пред центристичкиот градоначалник на Букурешт, Никушор Дан, кој доби 20,9% од гласовите.
