Уништени пруги, локомотивите дециниски, железничкиот сообраќај во државата е во хаос.Владата во заминување не го исполни ветрувањето за реконструкција и осовременување на железниците. Повеќе од месец дена се уште е блокирано кај Градско, а патниците кои тргнале со воз, се превезуваат со автобус. И додека Србија излезе со план за изградбата на пругата од Ниш до македонската граница, кај нас допрва ќе се започне со работа на студијата за изградба на брза пруга од Ниш до Скопје, за што двете земји заеднички ќе барат средства од Европската унија.
„Веќе ќе започнеме со работа на студијата за таа железничка пруга, на проектирање на основниот проект со сите процедури коишто претстојат за да биде реализирана согласно план, процедура, проектирање„ изјави министерот за транспорт и врски Благој Бочварски.
И во патната инфраструктура работите не одат глатко. Се уште тапка во место изградбата на автопатот Кичево-Охрид, кој почна да се гради уште пред десетина години. До крајот на неделата Бочварски се надева дека ќе го добие извештајот на експертите, по што ќе се знае дали ќе има раскинување на договорот со кинеската компанија Синохидро.
„Се уште не можеме да зборуваме за раскинување на договор, не можеме да зборуваме за идните чекори се додека тој извештај не биде разгледан и при тоа не биде донесена одлука од страна на Владата„ рече министерот за транспорт и врски, Благој Бочварски.
Денеска Бочварски најави нов рок за финализирње на брана на река Отиња во Штип. Наместо до јануари 2024 како што беше планирано, сега очекуват да биде готова до крајот на наредната година.
Александра Ристеска
