Во време кога вештачката интелигенција е сè поприсутна, треба правилно да се избориме со предизвиците и да го зачуваме нашиот македонски јазик и нашата азбука. Според универзитетскиот професор Димитар Пандев, важно е да се најде средината меѓу јазикот на охридската книжевна школа и јазикот на вештачката интелигенција.
- На оваа историска фреквенција, пред нас се отвораат две клучни прашања, едно рационално од областа на логиката и когнитивната лингвистика, тоест на начинот на функционирање на човековиот ум, а второ од историскиот развој на македонскиот јазик и образованието во Македонија – истакна универзитетскиот професор Димитар Пандев.
Македонскиот јазик не е дел само од наставната програма, туку тој е дел од сржта на образованието. Затоа треба да го чуваме и негуваме во услови на многу предизвици и искушенија.
- 80 години од објавувањето на македонската граматика од Круме Кепески значат 80 години систематско осмислување на јазикот како темел на образованието, науката и културната самосвест – истакна пратеничката Иванка Василевска.
Пратеничката Бисера Костадиновска Стојчевска го истакна значењето на официјализирањето на македонскиот јазик и усвојувањето на македонската азбука на 16 април 2019 година.
- Оваа одлука претставува еден од најважните моменти во историјата на македонскиот народ, бидејќи со тоа македонскиот јазик добива статус на службен јазик во државата, а македонската азбука станува официјално писмо – истакна пратеничката Бисера Костадиновска Стојчевска.
Мисијата на првата граматика на Круме Кепески е исполнета, бидејќи со неа се образувале многу ученици и студенти, а со тоа и го негувале македонскиот јазик и азбука, е генералниот заклучок од одбележувањето на Денот на македонскиот јазик, 5 мај, во македонското Собрание.
