Онлајн сексуалната злоупотреба на деца е еден од најсериозните предизвици со кој што се соочуваме во денешната дигиталната ера. Првата детска амбасада во светот Меѓаши со своите активности постојано работи на заштита на правата на децата, вклучително и на заштита од сексуално искористување и злоупотреба на децата. Според Драги Змијанац треба да се создаде сигурен и безбеден дигитален простор за децата а во превенцијата треба да бидат вклучени и родителите, професорите, наставниците како и институциите.
„Имаме наш телефон за деца и млади кој работи 24/7 и е место кај што младите ќе може да комуницираат со наши оператори. Тоа е една благородна улога што ја има „Меѓаши“ како организација и се надевам дека секој во државата ќе ја сфати неговата важност и улога.“- изнави Претседателот и основачот на Првата детска амбасада Меѓаши, Драги Змијанац.
Во ера кога децата од 8 до 10 часа поминуваат на интернет, дигиталната средина станува се поважна за нив, особено кога образованието се повеќе се потпира на дигиталните услуги. Тоа освен што нуди нови можности, истовремено и отвара нови ризици за нивно прекршување и злоупотреба. Психолозите препорачуваат отворен разговор без осудувања и навремена едукација на децата.
„Да обезбедуваме простори за разговор со децата. Колку помала возраст, толку подобро. Да зборуваме за тоа што значи приватност, правото дека можам да кажам не за нешто за кое што не се чувствувам безбедно. Да се насочат кампањи и на владиниот сектор, па и на јавните институции. Да се смислуваат такви кампањи за да се поттикнеме сите ние.“- изјави психологот Јорданка Черепналкова Трајкоска.
Младите велат дека најважна е едукацијата за ризиците што се јавуваат на социјалните мрежи, но и да се охрабруваат тоа и да го пријавуваат во јавноста. Искуствата неретко кажуваат дека при вакви случаи, младите кои се жртви стравуваат од такво нешто, плашејќи се од реакциите на околината. Во Македонија до сега имало случаи на сексуална злоупотреба на фотографии.
