Четири политички партии останале без буџетските пари кои им следуваат од последните избори затоа што се уште не поднеле финансиски извештај каде трошеле, што е законска обрска. Сите останати, преку 60-на, ги испочитувале роковите и обврските на последните парламентарни и претседателски избори и веќе го наплатиле својот дел. Ова го покажа извештајот на Државниот завод за ревизија за 2024 година.
„Нема поголеми прекршувања во делот на претседателските и парламентарните избори. Клучната костатација на ДЗР е констатацијата дека 77% од платеното политичко рекламирање за претседателските избори се финансира од буџетот на државата преку ДИК, додека за парламентарните избори некаде околу 67%“, изјави Максим Ацевски, главниот државен ревизор.
Законски е дозволено правни и физички лица да донираат и по завршувањето на изборите. Но, токму тоа, според Државниот завод за ревизија, ја нарушува рамноправноста – бидејќи парите најчесто завршуваат кај победниците.
„Остануваат и понатаму состојби кои треба да се надминат во делот на системските слабости, а тоа е во делот на уредување на начинот на уплата на донации по завршување и објавување на конечните резултати од спроведените избори, бидејќи знаете нашето законодавство дозволува по извесен период по објавувањето на конечните резултати одредени правни и физички лица да уплатуваат донации, а секако дека кога веќе ќе се знаат резултатите тогаш останува можност секој оној кој е заинтересиран да уплати ќе уплати на победникот, а не на сите подеднакво“, изјави Максим Ацевски, главниот државен ревизор.
Амбасадорката на Швајцарија, Вероник Хулман, оцени дека клучно за демократски и фер избори, при менувањето на изборниот законик, е да бидат земени во предвид заклучоците од Државниот Завод за ревизија, но и да се почитуваат препораките од Венецијанската комисија.
Со 88 извршени ревизии и 132 објавени извештаи, главниот државен ревизор Ацевски, ја оцени минатата година како период на зголемена транспарентност и одговорност. Сепак според него, останале старите проблеми – финансирањето на изборните кампањи и донациите што пристигнуваат по изборите.
