Општина Струга распиша јавен повик за пријавување штети на земјоделски насади, предизвикани од природната непогода со снежни врнежи и ранопролетна голомразица што ја зафати општината на 6 април годинава.
„ Општина Струга ги повикува сите граѓани кои претрпеле материјални штети на своите земјоделски насади, предизвикани од снежните врнежи и голомразицата на 6 април, да поднесат барање за пријава на штета. Барањето е достапно во архивата на Општина Струга,“ се наведува во повикот.
Заедно со барањето, потребно е да се достават и копии од имотен лист, лична карта, трансакциска сметка и доказ за користење на земјиштето за насади.
Во проценката на штетите ќе бидат опфатени земјоделски култури постари од три години, со најмалку 20 стебла или корени.
Пријавувањето може да се изврши од 18 април до 3 мај, секој работен ден од 9:00 до 15:30 часот.
