Веќе втора недела надлежните со крајни напори го држат под контрола пожарот кај „Јасен“. Огнените јазици кои оставија пустош и пеплосана вегетација, во текот на ноќта се доближија до шумскиот пат кон езерото Козјак. Благодарение на навремено расчистениот терен, нивното ширење беше спречено. На терен се распоредени војници и полицајци од елитните единици „Волци“ и „Тигри“, претежно алпинисти, кои во опасни услови работеа на расчистување на појасот и сузбивање на огнената стихија. Во акцијата учествуваа и полициски и армиски хеликоптери, а од изутрината започна ризична операција за создавање нов противпожарен појас.
„Утрово започна и специфична и опасна операција за правење нов противпожарен појас на стрмниот гребен кој се спушта кон езерото, со цел огнот да биде целосно запрен. И покрај густиот чад, еден полициски и еден армиски хеликоптер веќе дејствуваат од рано утро, а се очекува приклучување и на ер трактор од ДЗС штом се расчисти видливоста“, изјави Стојанче Ангелов, директор на ДЗС.
Во моментов во Македонија се активни уште неколку пожари, но засега се без закана, бидејќи горат само трева и ниски грмушки. Дождот од почетокот на неделата помогна да се изгаснат најголемиот дел од пожарите во Македонија. Од покритичните места, сè уште гори во Прилеп, во атарот на селото Ливада, каде што е зафатена букова шума. Целосно изгаснати се пожарите во Гази Баба, Петровец, Струга и Студеничани. Надлежните предупредуваат дека и покрај подобрената состојба, опасноста останува – доволна е само една искра за да се разгори ново жариште.
