Законот за изменување и дополнување на Законот за јавните набавки, за кој претседателката Гордана Сиљановска-Давкова одлучи да не го потпише указот за прогласување, денеска повторно се разгледува во Собранието, во рамки на 129. пленарна седница.
За законските измени се поднесени вкупно 2.158 амандмани. Владејачкото мнозинство поднело амандман со кој се бара бришење на спорниот член 13, согласно укажувањата на претседателката, додека најголемиот дел од останатите амандмани се поднесени од СДСМ.
Сиљановска-Давкова на 4 ноември испрати допис до Собранието, во кој информираше дека, по внимателна анализа и консултации со експерти, согласно член 75 став 3 од Уставот, одлучила да не го потпише указот за прогласување на законските измени, усвоени на собраниската седница на 26 октомври 2026 година.
Како клучна причина за ваквата одлука го посочи членот 13 од законските измени, со кој се менува начинот на именување на претседателот и членовите на Државната комисија за жалби по јавни набавки.
– Сметам дека новото законско решение, во, за мене, спорната одредба од членот 13 од Законот за изменување и дополнување на Законот за јавните набавки, отвора сериозни дилеми за владеење на правото. Имено, ставот 4 на членот 132 од Законот за јавни набавки, којшто гласеше: „Претседателот и членовите на Државната комисија се именуваат за период од 5 години, со право на уште еден избор“, со членот 13 од Законот за изменување и дополнување на Законот за јавните набавки, се смени и гласи: „Претседателот и членовите на Државната комисија се именуваат за период од 5 години, со право на повторно именување“. Формулацијата „со право на повторно именување“, за разлика од формулацијата „со право на уште еден избор“, којашто јасно воспоставува лимит од 10 години, е случајно или намерно правно непрецизна и нејасна и остава простор за арбитрерна интерпретација, во смисла на неограничен реизбор. Во духот на мислењата и препораките на Венецијанската комисија, укажувам дека ако можноста за еден резибор, во смисла на 5+ 5 години членство во Комисијата за набавки, овозможуваше голема моќ и влијание, тогаш легализацијата на неограничениот број мандати се заканува со концентрација на апосолутна моќ во неколкумина во одлучувањето за трошење на огромни износи државни пари – напиша претседателката Сиљановска Давкова.
Потсети и дека работата на ова тело низ претходните децении била обележана со низа проблеми, сомнежи, обвинувања и дилеми за (не)пристрасно, (не)одговорно и (не)законско работење.
– Во оваа смисла, би разбрала решение за ограничување на членството во Комисијата за набавки на еден мандат, односно на пет години, но имам низа дилеми за оправданоста на законската можност за неограничен број мандати.
Молам, од демократски причини, Собранието, при повторното разгледување на членот 13 од Законот за изменување и дополнување на Законот за јавните набавки да се обиде да ги разбере причините за моето вето, водејќи се од начелото на владеење на правото – посочи претседателката.
Согласно членот 183 од Деловникот за работа на Собранието, ако претседателот на Републиката одлучи да не го потпише указот за прогласување на законот, Собранието повторно го разгледува законот во фаза на трето читање, во рок од 30 дена од денот на донесувањето на законот. По повторното разгледување на законот, амандмани можат да се поднесуваат само во врска со укажувањето на претседателот. Рокот за поднесување амандамни за измените заврши во петокот, на 6 ноември.
На дневен ред на денешната 129. седница се и Дополнетиот предлог за изменување и дополнување на Буџетот за 2026 година, измените на Законот за извршување на Буџетот, како и Предлог-законот за ратификација на договорот со Албанија за воспоставување заеднички гранични премини и спроведување заеднички гранични контроли.
Пратениците ќе расправаат и за предложените измени на законите за здравствено осигурување, за Кривичниот законик, за задолжително и доброволно капитално финансирано пензиско осигурување, за Фондот за осигурување на депозити, за земјоделство и рурален развој, како и за семејството и семејната и станбената поддршка.
