Празни улици, затворени училишта, маркети без залихи. Ваква е моменталната слика во северна Италија каде бројот на починати од коронавирус постојано расте.
Македонската активистка Илона Захариева од Канели ексклузивно за Алфа ја опиша моменталната состојба. Вели дека владее паника во земјата, 11 градови се под карантин, а војската спречува влез и излез од критичниот реон.
„Апел од властите е да не се крева паника, но мерките кои се строги креваат паника кај луѓето, овде луѓето многу се движат, а со тоа можноста да се прошири вирусот е голема“, изјави Илона Захариева.
По првиот регистриран случај со корона вирус беа откажани Венецискиот карневал, Модната недела во Милано, како и повеќе фудбалски натпревари на италијанските прволигаши.
Дека вирусот се приближува кон Македонија покажува и првиот регистриран сомнителен случај на корона во Косово. Хрватите будно ја следат ситуацијата со вирусот, а гимназијалците кои биле на екскурзија во Италија се ставени во куќен карантин.
За разлика од Италија каде тревогата е максимална, белгиските власти сметаат дека не се потребни нови мерки во однос на епидемијата.
Затоа пак Словенечките власти го свикаа Советот за национална безбедност, и покрај тоа што таму се уште нема потврден случај на заболено лице. Последните информации од жариштето на вирусот -Кина се дека повеќе од 3.000 здравствени работници се заразени.
Во светски рамки од корона вирусот починаа 2.465 луѓе, додека 79.930 се заразени.
Симона Србиноска
