Директорот на Историскиот музеј Крушево, Миха Оџаклиески си поднесе неотповиклива оставка. По бројните реакции затоа што дозволил косовскиот рапер Дон Џони да сними спот во Македониумот, место кое важи за заштитено културно наследство тој се повлече од функицијата. Оџаклиески навел дека одлуката е личен, морален и етички чин и израз на одговорност кон институцијата и кон јавноста. Оставката следува по реакцијата и на премиерот Христијан Мицкоски кој побара разрешување освен на директорот и на членовите на Управниот одбор.
„Ги следев тие реакции, навистина тоа што таму се случило, претставува нешто што не требало да се случи. Јас ќе побарам од министерот за култура и туризам да биде разрешен директорот на таа институција, заедно со Управниот одбор, бидејќи таков тип институции не треба да бидат изнајмувани и користени за такви намени. Јас им се извинувам на граѓаните поради тоа што тој пропуст е направен и се случил и ќе се трудиме во иднина такво нешто да не се повтори“, изјави премиерот на Македонија, Христијан Мицкоски.
Директорите треба да внимаат за каква намена ги издаваат објектите, апелираше министерот за култура и туризам. Сулејмани највува разрешница на случајот кој ја вознемири јавноста.
„Ние како Министерство сме надлежни да ги браниме сите артисти и сите тие што се културни работници. Имаме еден случај пред себе што е чувствителен, но ќе треба да видиме со правните служби како понатаму, и ако треба некоја законска измена да се направи. Имаат право да изнајмуваат, но директорите треба да внимаваат кога изнајмуваат објекти, да знаат какви програми ќе се одржуваат и со каква содржина“, изјави Седат Сулејмани – министер за култура и туризам.
Македониумот му бил изнајмен на косовскиот рапер Дони Џони за 500 евра, за пет до шест часа снимање. Директорот на Историскиот музеј во Крушево, Миха Оџаклиески, потврдил дека продукцијата претходно побарала дозвола, а просторот бил отстапен врз основа на одлука на Управниот одбор.
Во меѓувреме, косовскиот рапер Дон Џони, кој во Македониумот го сними спотот за својата песна Секси Мама, се огласи на социјалните мрежи. Порача дека ниту тој ниту неговиот тим имале намера да провоцираат, навредуваат или да ја намалат вредноста на која било земја или симбол. Локацијата, како што објасни, била избрана од продукцијата како дел од сценариото, без скриена порака или намера за провокација.
