Авиосообраќајот во Македонија руши рекорди. Аеродромите во Скопје и Охрид се најбрзорастечки во својата категорија, со над 2 милиони патници во првите шест месеци годинава и 28 нови дестинации. Вицепремиерот и министер за транспорт Александар Николоски, вели дека во текот на целата 2025-та бројот на патници бил 3 милиони, а проекциите се дека до крајот на оваа година бројката може да биде за еден милион повисока. Во првата половина од годинава има прелет на 173 илјади летала над македонскиот воздушен простор, што е за 12,2 проценти повеќе од 2025-та, за 23 повеќе од 2024-та и за 27 проценти повеќе од пред три години. Апослутни рекорди се бележат во текот на месец јули кога имало 42.000 илјади прелета.
-Оваа година двата Аеродроми заедно имаат раст од 32 проценти. Ако зборуваме во апсолутни бројки, ако минатата година достигнавме бројка која изгледаше недостижна, а тоа е 3 милиони патници на двата Аеродроми, ние очекувавме дека оваа година ќе се движиме некаде околу 3 и пол милиони, веќе на пола година сме на два милиони, што значи дека со малку среќа до крајот на годината можеме да стигнеме до четири милиони патници. Ако тоа не се случи во 2026-та, тогаш сигурно во 2027-ма ќе стигнеме до четири милиони патници, изјави Николоски.
Ваквите позитивни бројки во авиосообраќајот со себе носат и неопходна модернизација на контролата за безбедност, поради што целосно пуштен во употреба е новиот АТМ систем на М-НАВ, што е од исклучително значење за повисоко ниво на безбедност, сигурност и ефикасност во справувањето со предизвиците во воздушниот сообраќај.
-Со новиот АТМ систем пред се ја стабилизираме М-НАВ, како давател на услуги во воздухопловната навигација и обезбедуваме повисоко ниво на сигурност, континуитет во давањето на услугите. А ова е особено важно во период кога воздушниот сообраќај во македонскиот воздушен простор бележи енормен пораст, изјави претседателот на УО и извршен дирекотр на Сектор за воздухопловна навигација, Владимир Ристески.
Николоски потесети дека овој систем е поврзан со скандали кои ги остави Владата на СДСМ и ДУИ, но со новото раководство М-НАВ, со добра координација, системот после долги години конечно е инсталиран и ставен во функција.
-Ова е систем кој што има своја долга историја, се сеќавате на големите скандали од претходната Валда на СДСМ и ДУИ. Набавката е започната уште во 2014 година, а договорот е склучен во 2018 година со италијанската компанија Леонардо. Од 2018 до 2024 година нема никакви активности, со тоа се соочуваа и истражните органи во изминатиот период. Со изборот на новото раководство на М-НАВ почна интензивна работа, со што еве денес сведочиме на ставање во целосна функција на ATM системот, изјави Николоски.
Во текот на септември или октомври ќе биде целосно ставен во функција и новиот радар, со што македонскоот небо ќе има највисок систем на контрола и безбедност. Тој веќе е во контролната кула и во моментов се вршат потребните тестирања. Со воведувањето на овие два системи целосно ќе биде покриено македонското небо, на највисоко ниво што во моментов во светот може да се најде.
Матеја Петровски
